韋家輝大時代來臨
1992年的《大時代》，就係韋sir第一部擔任監製嘅台慶劇，其經典之處都無謂多講。1993年又有黃日華陳秀雯主演的《馬場大亨》。韋sir的劇集有幾個特色，首先多數會以倒叙形式講故仔，第一集往往就係大結局的其中一幕。
其次係情節極度煽情，要在短短兩、三集之間，已能掀動大家情緒追看落去，其中務必要有個極具話題的場面以炒熱個勢，例如《誓不低頭》曾江一刀劈死人全家，連細路都唔放過；《大時代》第一集就開宗明義講你聽丁蟹幾父子會跳樓死，然後要你慢慢追番到底因咩而跳？《馬場大亨》更加有尹揚明誤將四個女兒焗死於車廂內的震撼場面。
結局方面又多以open ending作尾，《義不容情》的劉嘉玲最後有冇出現呢？《大時代》的周慧敏係咪死咗呢？《馬場大亨》的黃日華中槍後又趕唔趕得切去醫院呢？總之要留個餘韻俾大家討論落去。
齊齊正正大卡士
台慶劇有另一種傳統，就係要傾巢而出，最好講到俾人聽集齊幾生幾旦拍呢套劇，咁先夠照，所以呢類人多勢眾劇又會有一定收視。1995年《笑看風雲》，就集齊鄭少秋、鄭伊健、郭晉安、古巨基、郭藹明、陳松伶等主演，然後內容包羅萬有，主調係商戰，加點點兄弟情，再有感情線鋪排，去到最後又死人塌樓加多首插曲，咁樣成件事又成為經典。
同一橋段，用到1997《美味天王》上，轉以搞笑模式，由肥姐同歐陽震華、關詠荷牽頭，加埋古天樂、宣萱、張可頤，而且久唔久一集又會有其他星客串，好似羅嘉良會做水喉佬，而張家輝、楊千嬅、林保怡都會客串演出，令成件事更添歡樂氣氛，總好過又你爭我奪鬥生鬥死。
而呢種格局最巴閉嘅一套，肯定係為千禧年而拍的《創世紀》，夾埋成百集，羅嘉良、陳錦鴻、郭晉安、古天樂、吳奇隆、郭可盈、陳慧珊、蔡少芬、汪明荃、邵美琪、郭鋒、秦沛，當年冇份參與都真係要諗諗自己得罪咗邊個高層，不過套劇都係拖拖拉拉，淨係陳慧珊都單戀咗羅嘉良80幾集，夠你瞓三覺。
事業心重的《烈火雄心》《衝上雲霄》
台慶劇最常出現嘅職業係做生意，咩生意都好，總之就做生意，由無命小子做到出人頭地，最緊要係大結局嗰集可以立番靚個頭回味當初。不過有時都會以一門職業做主打。
1998年《烈火雄心》，就係講王喜、錢嘉樂、鄭敬基由細玩到大嘅三兄弟，考做消防員，然後入面遇到強敵古天樂，成個格局就係《新紮師兄》，王喜就係杰佬梁朝偉，鄭敬基係高佬泉呂方，古天樂就係fit佬劉青雲，咁當然劇集模式來來去去嗰幾樣，好睇就得啦！
另一經典係2003《衝上雲霄》，以航空業為題材，機師、空姐、地勤大把職位你寫，而且該劇仲專登叫番吳鎮宇回巢，佢又唔欺場喎，梳番個飛機頭作為回饋觀眾。
不過呢類職業劇，又會有個「職業病」，就係做做下會冇乜事業心，講唔到幾集，大家就會有火唔救，有飛機唔揸，去晒拍拖媾女，到結尾兩三集，先會用一場大災難去call back大家歸隊，來到今時今日都係咁樣。
《金枝慾孽》《溏心風暴》無限Loop
2000年打後，大家睇劇嘅渠道開始擴闊，選擇多了，加上創意開始滿足不到見慣世面的觀眾，令台慶劇吸引力大降。收視唔好就求穩陣，於是又出現另一現象︰《金枝慾孽》《溏心風暴》無限Loop。
兩套均不是當年台慶劇，但分別在2004及2007掀起一股旋風，製造了宮廷女人勾心鬥角同家族爭產兩大劇柱，而是大家都捉實呢條柱，繼續拍落去。
2005年先有《胭脂水粉》，講陳豪、黎姿、蒙嘉慧、向海嵐在三十年代的香港，經歷一個大家族的興衰，而女人間的互鬥也少不了。
2009《宮心計》07有啲似《金枝慾孽》，但更似《大長今》，佘詩曼飾演嘅三好，善良到極，但被好姊妹楊怡陷害。2011《萬凰之王》又係宮廷鬥爭劇，宣萱鬥胡杏兒，又有陳錦鴻回歸相助，不過都冇乜成效，反應一般。
2012《名媛望族》，又係女人鬥爭加爭產，重點有劉松仁同陳玉蓮坐鎮，不過就俾江美儀對黑絲成功勾引松哥搶晒鏡，只係收視都麻麻。同年的《大太監》，又係宮廷鬥爭劇，黎耀祥飾演李連英，米雪係慈禧太后，今次又扑番中，收視唔錯，仲令幾位太監可以添食，開拍搞笑版《公公出宮》。
